|
大家好,我係五月,好耐無見。
因為已經入唔返個ac,唯有開新ac。
其實已經上過嚟幾次,不過入唔返ac,所以都無留言。
尋日上嚟再望,見到原來仲有d舊人,係非常非常舊嘅人會上嚟回post,
甚至仲有人管理緊個論壇,非常之感謝仲打理緊嘅超版。
曾經係到日傾夜傾,樂古傾,msn傾,傾到變朋友,真係難以想像嘅時光。
好感謝果d曾經同我一齊傾嘅人,無論我地有無見過面。
見到聊廣嘅post,仍然有人記得自己,真係有d慚愧,
當初自己默默咁離開咗,竟然仲有人記得。
我諗已經無咩討論區可以做返果陣時嘅效果,果陣時嘅論壇交友模式,
畢竟呢家大家上網都已經習慣匿名隱身,亦都有所顧慮。
過往除咗開心吹水,都曾經為咗不同嘅事嘈過鬧過,不過呢家睇返都係寶貴嘅回憶。
雖然好幼稚,但係呢d係好獨特嘅經歷,呢家上連登罵戰都唔會有果種感受。
最後,真係非常感謝大家留低嘅回憶。願大家安好。
五月 (Poon) 上
18/03/2021 |
|